Yawg Nkias Mas, yog yawg Txoos Lwm tus tub ntxawg.

Yug Xyoo: 1915
Tas Sim Neej: 8 hli ntuj 1988.
Hnub nyoog muaj 73 xyoos.

Kev ua hauj lwm pab lub teb chaws:

• Txij li hnub nyoog muaj 18 xyoo, yawg NkiasMas tau ua ib tug tswv zos saib xyuas rau lub zos Phas Las Mus los tau ntau xyoo.

• Tom qab ntawv yawg Caub Moos XiengNgeun(Caub Moos KhamPheeng) tau coj kev pom zoo ntawm Huab Tais Moos Loob tuaj muab yawg NkiasMas tsa ua Phias Mab Nis. Ua Phias Mab Nis los txog xyoo 1962.

• Tau ua Nai Khej txij 1962 txog rau 1973.

• Tau ua Lieutenant txij 1969 txog 1974.

• Tau ua ib tug Kev Txwj laus nyob rau Moos XiengNgeun txij 1976 txog 1979.

Yawg NkiasMas, yog peb tsev Hmoob Hawj Liab Tub Ntxawg ib tug coj noj coj ua thiab paub tab nyob rau lub sij hawm ntawv. Vim kev coj ncaj coj tus thiaj ua rau pej xeem huab hwm, vaj tsab xeem lis nyob pem toj nram hav los hlub thiab hwm yawg NkiasMas.

Yawg NkiasMas, tseem yog thawj tug ntawm peb tsev Hmoob Hawj uas tau mus hes thiab kwv Huab Tais Nplog nyob rau hauv Nroog Moos Loob.

Yawg NkiasMas, yog thawj tug ntawm peb uas tau nrog Huab Tais tham ua ke, noj mov ua ke. Thiab tseem tau nrog cov noob huab tais tham, tuav tes ua phooj ywg, thiab noj mov ua ke.

Yawg NkiasMas tau txiav Txhooj rau tsoom Hmoob sawv daws coj.

Thaum ub nyob rau sab teb chaws PhasLasMus, thiab ib tsheeb tsam ze ntawv muaj kev ua tshoob kos, kev sau nqi tshoob kos tsis sib thooj ib yam. Tus hov sau nqi tshoob ntau dhau los muaj, tus hov sau tsawg dhau los muaj, tus yuav muab plaub ntug sab nrauv coj los hais rau hauv rooj tshoob los muaj. Lub sij hawm ntawv sau nqi tshoob yog 5 choj nyiaj, tseem tau them nyiaj txhaum txheej, nyiaj niam hnav ib lub tsho, txiv hnav ib lub tsho, yog cov ntxhais hov muaj 2 viv ncaus niam laus thiab niam hluas, tab sis tus tub hov mus yuav tau tus niam hluas lawm ces yuav tau them nyiaj plhws tus niam laus hauv caug 5 maj nyiaj.

Thaum zoo li ntawv lawm, yawg Nkiasmas uas yog ib tug laus coj noj coj ua nyob rau lub roob PhasLasMus thaum lub sij hawm ntawv, nws thiaj tau hu tag nrho kev txwj kev laus cov coj noj coj ua, vaj tsab xeem lis uas nyob rau hauv cov zos uas nyob cig ib tsheeb tsam lub roob PhasLasMus, sawv daws tuaj sib sab laj sib tham kom nkag siab ua ke. Thiab yawg Nkiasmas tau muab nws ib tug sam nyuj los tua rau sawv daws noj thiab txiav ib tug txhooj rau sawv daws tau coj xws li nram no:

1. Nqi tshoob kos pub sau tsis dhau 8 choj 8 kis nyiaj.

2. Niam txiv tog ntxhais ua tus npaj rooj noj rooj haus tag nrho.

3. Yog tias muaj poj cuag yawg cuas sib ntau thaum hmo, es tag kis tub ntxhais hov sib yuav los txwv tsis pub muab coj los hais ua plaub ntug rau hauv rooj tsoob, rooj tshoob yuav tsum ua dawb ua huv xwb.

4. Leej twg yuam cai sau nqi tshoob dhau 8 choj 8 kis nyiaj, leej twg muab plaub ntug los hais rau hauv roob tshoob ces yuav raug nplua 1 tug sam nyuj thiab 10 ntim cawv.

Tus Txhooj no muaj cov zos tau siv li nram no:

1. Zos Phas Las Mus

2. Zos Roob Nyuaj Qus

3. Zos Phuaj Xeeb Neeb

4. Zos Roob Mob Txia

5. Zos Phuaj Ias

6. Zos Tiaj Ntoo Qaub

7. Cov zos tim Keem

8. Zos Hoy Phak

9. Zos Pha Louang

10. Zos Pha Khao…

Dhau li cov zos sau no lawm lawv mam siv lawv ib tug Txhooj.