THE HERR FAMILY
PHAU NTAWV TEEV CAJ CES
KEEB KWM LUB NPE “ HAWJ LIAB TUB HLOB, HAWJ LIAB TUB NRAB THIAB HAWJ LIAB TUB NTXAWG ”.
Keeb kwm tau lub npe hu tias “ Hawj Liab Tub Hlob “, “ Hawj Liab Tub Nrab “ thiab “ Hawj Liab Tub Ntxawg “, muaj raws li nram no:
Tej poj koob yawm txwv, tej pog tej yawg, tej niam tej txiv ib tiam yeej piav hais qhia rau ib tiam hais tias thaum ub muaj ib tug yawg koob xeem Hawj, nws mus yuav tau ib tug ntxhais los ua nws poj niam.Tus poj niam nws yog tug neeg tsis loj ces thaum nws cub mov los sis ua zaub rau hauv lub yias uas txawb rau saum “Qhov Txos”, ces nws pheej nce mus zaum nyob rau saum qhov txos do zaub do mov, dhia mus dhia los yam li tus poj Liab. Ces thaum tib neeg pom li ntawv thiaj li muab hu hais tias “ Poj Liab”.
Nkawv los nyob ua lub neej txij nkawm ua ke tau ntau xyoo txawm muaj tau 3 leeg tub. Tus tub Ntxawg ces tseem noj niam mis, tseem tseg mis tsis tau.
Tab sis thaum tau lub npe hu ua “Poj Liab” los lawm, txawm ua rau tus txiv muaj kev txaj muag rau lub teb lub chaw, txaj muag rau tsoom neeg sawv daws; thiaj ua rau tus txiv tsis xav yuav tus niam uas tau lub npe tias poj liab ntawv. Muaj ib hnub tus txiv txawm nrhiav tau ib lub tswv yim tias coj cov tub khiav mus nyob rau lwm qhov, es tso poj liab pov tseg.
Thaum xav tau li ntawv lawm, tus txiv txawm hu kom poj liab los tsuj tw cos txheem tseg, ces tus txiv txawm muab tau ib cov qe qaib coj los tso rau hauv lub qhov cos thiab hais rau poj liab tias txheem twj ywm tseg nawd, yog tseem tso cos los ntau cov qe qaib tawg tas thiab mas yuav muab poj liab tua pov tseg.
Tas ntawv ces tus txiv txawm coj 3 leeg tub nrog nws khiav mus lawm, lawv mus mus ib tav su hnub qaij, ces tus tub ntxawg tshaib tshaib plab thiab quaj quaj yuav noj niam mis xwb, ces tus tub ntxawg tsis kam mus lawm. Thaum zoo li ntawv lawm ces leej txiv thiaj tso leej tub ntxawg rov qab los tsev los noj niam mis.
Thaum tus tub ntxawg los txog tom tsev, tseem pom poj liab txheem rawv lub cos, ces nws txawm los taij rau leej niam hais tias yuav noj mis, tab sis leej niam hais tias nws tsis tau khoom, tseem txheem cos yog tso ces yuav mus ntaus cov qe qaib hauv qhov cos tawg ces lawv txiv yuav muab tua pov tseg.
Thaum hnov tus niam hais li ntawv lawm tas ces tus tub ntxawg mam hais qhia rau nws niam tias nws txiv twb coj lawv 3 kwv tij khiav mus lawm, tab sis vim yog nws tshaib tshaib plab, nqis nqis mis, es nws thiaj rov qab los xwb. Thaum poj liab paub li ntawv tas ces poj liab mam hais rau tub ntxawg tias yog koj yuav noj mis no ces koj mus muab cov qe qaib hauv lub qhov cos tshem tawm kom tas, es niam txo lub cos tas tso mam muab mis rau noj.
Thaum leej niam hais li ntawv tas ces tub ntxawg thiaj mus muab cov qe qaib hauv lub qhov cos tshem tawm tas, poj liab thiaj txo cos, ces mam los muab mis rau tub ntxawg noj.
Thiab poj liab, thiaj tsawm foom rau lub ntuj daim av tias leej txiv siab tsis zoo leej txiv khiav lawm, thiab tub hlob, tub nrab nrog leej txiv khiav mus lawm ces kom mus ua lub neej txhob huaj vam, yog mus txua qhov cos mas kom ntoo ntaus kom tuag, kom taus raug tes raug taw. Hos leej tub ntxawg mas kom mus ua lub neej huaj vam, muaj me tub me nyuam nyob pu pem toj siab mus thoob rau tiaj nrag, kom ua lub neej nyob mus ciaj vaj, ciaj nom ciaj tswv thiab txua tau "Qhov cos" los siv.
Txij li leej txiv tau khiav tso poj liab thiab tub Ntxawg nyob, nkawv ob niam tub ua lub neej nyob tsis paub ua kev cia dab qhua li lawm ces thiaj mus kom muam Phauj qhia dab rau coj. Txij ntawv los ces poj liab thiab tub Ntxawg thiaj coj muam Phauj dab qhua uas yog xeem hmoob vaj loj niaj hnub nim no cov kev cia dab qhua xws li:
-
Yawg caiv Nyab, Nyab caiv Yawg,
-
Txiv Laus caiv niam Ncaus, Niam Ncaus caiv Txiv Laus,
-
Poj niam nce tsis tau saum ntab, hla tsis tau yees ntab yees tsev,
-
Ev tsis tau Txiv Qaub nrog Mov Su.
-
Ua Nyuj Dab muaj 33 txig 3 ntsau, cim rau sab Xis,
-
Ua Dab Roog muaj 9 txig, cim rau sab Laug,
-
Tso Ntxa tav roob, Taub Hau tig rau sab hnub tuaj, Ntxa xov Vaj Lig.
Hos " Hawj Liab Hlob" thiab "Hawj Liab Nrab ", ces mus ua lub neej coj kev cai raws li qhov lawv tau coj tas los. Nkawv lub neej thiab xeeb leej xeeb ntxwv muaj lo lus khaum thaum ub Poj Liab tsawm tseg ces lawv tsis muaj peev xwm yuav txua "Qhov Cos" los ntawm lawv tus kheej coj los siv. Yog lawv tus kheej cia li mus ntov tsob ntoo los sis muab yav ntoo coj los txua ua "Qhov cos" xwb ces ntoo yuav vau ntaus tuag, cav ntoo yuav tsuam tuag; Riam, Txuas, Taus yuav raug tes raug taw mob tuag. Yog li ntawv txhua txhua zaug uas lawv yuav txua " Qhov cos" ces yuav tau mus thov lwm tus los sis qhua sab nrauv mus ntov tus ntoo los sis yog txiav yav ntoo 3 riag los 3 taus tas lawm mas lawv mam mus muab txua ua "Qhov cos" tau, ntoo thiaj yuav tsis vau ntaus, cav ntoo thiaj tsis tsuam tuag; Riam, Txua, Taus thiaj yuav tsis raug tes rau taw mob tuag.
Niaj hnub no cov kwv tij uas yog caj ces los ntawm Hawj Liab Hlob thiab Liab Nrab nkawv thiaj tseem coj raws nraim li qhov tau hais los ntawv.
Txij thaum ntawv los thiaj li txawm taus lub npe “ Hawj Liab Tub Hlob, “ Hawj Liab Tub Nrab” thiab “ Hawj Liab Tub Ntxawg”.
Herr Family Tree:
Nyob Los Tsuas Teb
Ya Her
: Ya Her(Xaykham). P.O.BOX 11282, Vientiane Lao P.D.R.
: dr.yaher@yahoo.com
Nyob MemKuj Teb (USA)
Seng Herr
E-mail: hertxh@yahoo.com
