Peb no mas yog Hmoob Hawj Liab Ntxawg. Thaum ub Poj Liab tau muab ib txog cai rau peb coj los txog rau niaj hnub nim no. Yog leej twg coj zoo, ua raws li Poj Liab tau qhia ces thiaj yuav nyob ua lub neej huaj txhaij huaj vam.

Cov kev cai muaj raws li nram no:

1. Ua Nyuj Dab mas ua kom muaj 33 txig leej 3 ntsau, cim sab Xis, thaum rau ces muab sab xis ua ntej. Ua kom yog yog li ntawv thiaj yuav pov hwm tau yus tsev neeg, thiab yus tsev neeg thiaj yuav tau zoo nyob, huaj vam.

2. Ua Dab Roog mas ua kom muaj 9 txig, cim sab Laug, thaum rau ces muab sab Laug ua ntej. Ua kom yog yog li ntawv thiaj li zoo.

3. Yawg thiab Nyab noj tsis tau mov koom ib tsum. Yawg nkag tsis tau hauv Nyab lub txaj, Nyab nkag tsis tau hauv Yawg lub txaj. Yawg hla tsis tau Nyab lub qab cub, Nyab hla tsis tau Yawg lub qab cub. Poj Liab muab txoj cai no rau sawv daws coj yog vim li cas hov yuav tsum coj, twb yog vim hais tias thaum ub tus Yawg thiab tus Nyab tsis tsim txiaj, nkawv sib daj sib deev ces muaj ua dab ua npog lawm mas peb Muam Phauj thiaj tuaj tsawm hais tias kom caiv. Yog leej twg caiv tau zoo ces kom nyob huaj txhaij huaj vam, hos yog leej twg tsis caiv es hov sib daj sib deev, hla qab cub nkag hauv txaj ces kom dig muag thiab nyob txhob huaj txhaij huaj vam. Li ntawv thiaj yuav tau coj raws li ntawv.

4. Txiv Laus thiab Niam Ncaus noj tsis tau mov koom ib tsum. Txiv Laus nkag tsis tau hauv Niam Ncaus lub txaj, Niam nkag tsis tau hauv Txiv Laus lub txaj. Txiv Laus hla tsis tau Niam Ncaus lub qab cub, Niam Ncaus hla tsis tau Txiv Laus lub qab cub. Poj Liab muab txoj cai no rau sawv daws coj yog vim li cas hov yuav tsum coj, twb yog vim hais tias thaum ub tus Txiv Laus thiab tus Niam Ncaus tsis tsim txiaj, nkawv sib daj sib deev ces muaj ua dab ua npog lawm mas peb Muam Phauj thiaj tuaj tsawm hais tias kom caiv. Yog leej twg caiv tau zoo ces kom nyob huaj txhaij huaj vam hos yog leej twg tsis caiv es hov sib daj sib deev, hla qab cub nkag hauv txaj ces kom dig muag thiab nyob txhob huaj txhaij huaj vam. Li ntawv thiaj yuav tau coj raws li ntawv.

5. Poj Niam nce tsis tau rau saum nthab. Nce tsis tau rau saum nthab yog vim li cas, twb yog vim tias lub neej Hmoob thaum ub mas cuaj khaum heev, tuav ncuav tau ces coj mus zais rau saum lub nthab muaj ib hnub tus nyab txawm mus nyiag muab los noj, ua rau tus Pog pom ces tus Pog tsawm tseg tias yog tus poj niam twg nce rau saum nthab ces kom dig muag. Li ntawv thiaj yuav tau coj li ntawv.

6. Ev tsis taut xiv Qaub nrog mov su, noj tsis tau txiv Qaub ntxuag mov.

7. Poj niam hla tsis tau yees nthab yees tsev, hla tsis tau qab cub qab rais.

Tus Nyuj Dab thiab Dab Roog yog tseem tseem dab thiab tus Npua Tia: Tus Nyuj Dab thiab Dab Roog tseem ceeb dua tus Npua Tia, yuav txheeb dab txheeb qhua, ua dab ua qhua ces kom txhob ntseeg tus Npua Tia. Vim tus Npua Tia tsuj tsawg li muaj. Thiab tus Npua Tia ntawv kom qhua vaj tsab xeem lis tuaj ua tau, hos tus Nyuj Dab thiab Dab Roog mas tsis yog caj ces tiag tiag yuav tuaj ua tsis tau.

Ua neej nyob ib leeg yuav raws ib leeg kab, ib leeg yuav raws li leeg lw, li ntawv yuav tau coj raws nraim raws li tej laus coj los mas thiaj li yuav zoo. Txhob mus lawb dab lawb qhua, leej twg coj tau dab nthuav leej twg huaj txhaij huaj vam.

Kev Npam kev khaum

1. Yawg thiab Nyab sib daj sib deev, luag hais raws kev raws cai tas tab sis tshuav kev khaum.

2. Txiv deev Ntxhais, luag hais raws kev raws cai tas tab sis tshuav kev khaum.

3. Txiv Laus thiab Niam Ncaus sib daj sib deev, luag hais raws kev raws cai tas tab sis tshuav kev khaum.

Yog hais tias Yawg deev Nyab, Txiv deev Ntxhais, Txiv Laus deev Niam Ncaus mas yuav tau muab ib tug Nyuj thiab 12 lag nyiaj coj los kho kwv kho tij, kho dab kho qhua mas thiaj yuav tsis fam rau yus caj yus ces.

Tej lus no sau los ntawm yawg NkiasMas cov lus qhuab qhia hnub tim 16/ 01 / 1983.